شعر محكي /بالعامية السورية/ حيان حسن
كتبهاحيان حسن ، في 9 تشرين الثاني 2007 الساعة: 15:34 م
لا تْغافلي صَمتي
لاتغافلي صمتي
ولا تجرَحي النسيان
ضلي متل ما كنتْ
أرسم صورتِك
صورة ع كتف الغَيم
ضيّعها الزمانْ
بعدو الدمع
بيغّسل عيوني
سكران
بيطفّي
جَمر
سكران
وما كان بدّي
غير ما تكوني
متل القصيدة
تغافل الغفيان
جرحتي الصمت
بحكاية مجنوني
هجرتي السهر
وخيالك السهران
وحيات قلب
الخَيب ظنوني
رح ضل
شارد بالدني وسرحان
ولَملِم حروف
عملتها موني
وطلّع حكي
من فوهة البركان
ياهالقصيدة ليش مدفوني
لا تستحي
بعدي أنا جهلان
نسيت اللي راحوا بعيد
نسيوني
خزَقت الورق من دفتر
اللي كان
وما كنت فيّي
غيّر فنوني
تركتك متل مسودة
ع الحيطان
خَربط حكي
بالجن مسكوني
عملتِك غريبة
ما الا عنوان
وبعدو الدمع
بيغّسل عيوني
سكران بيطّفي
جَمر سكران
أنتِ وأنا والقمر
أنتِ وأنا
أخدتنا المراجيح
سافَرنا سوى
وكانت الغيمات
عم ترسم صُوَر
طلعنا أنا وأنتِ
وطلّعْنَا السّهَرْ
طال السهر طال
وغيّمِتْ سَما
وتسكرت للبواب
وكان عَ هاك القصر
في بوّاب
حامل مَعو سيف وترس
وجوقة غِني
وكان العرس
وخجل القمر
من ضو وشك
وانتَحَرْ
جرح الهوى
جرح الهوى مرتاح
وسّع بقلبي مداه
وما كان يتركني
والآه بعدا آه
ع النوم تلحقني
صار الحزن يفرش
صداه
والكل آكلني
يوم
اللي كنتْ أستناه
يرجّع ويمرجحني
رجع الزعل وياه
وبالغدر غافلني
محيت الأماني
ورحت
حَرْوق بأحلامي
حتى الأسامي
تغيّرت
بالسر قدامي
كلن ع بعضن
سافروا
مع ريح
عم بتجّرح خيالن
ياريح لاتنامي
وَحدو الغريب
بيلّفح خيالو
وبكل سَفرة بيرتمي
وبيضيع
وبيصير عمرو
بهدلة قبالو
مواجِع سَفر
بتخَربِط
مواضيع
روحوا اتركوني
متل زهرة فُلْ
غابِِتْ
ما بدا ترجَع
ولا تطل
متل النشيد
الضاع موالو
جرح الهوى
مرتاح
نيالو
شاب الحَكي
ياصَوتها
المليان حنيّة
وهييِّ عَ صدر الليل متكييّ
سرقتِ القلب
ضّج القلب
من لهفتو عليّي
صارْ الحكي موجة حلا
تردِدْ حَلاه
رموش عينيي
حاجي شمس
حاجي دفا
شاب الحكي شاب الحكي
فيّي
يا صوتها المليان حنية
بتمسَح غَفا الكلمات
متل الصلا
بخيّمة
بتمرق متل غيّمات
تروح وتجي
غيمّة
وزَخة مطر
ع أرض جردية
يطّلع نبع صافي
ويرّجع مشاوير منسية
يا صوتها االمليان حنية
غافي أنا
عم أحلم بكلمات
شوفا ع صدرالليل
صيحة آه
تعلا ع آخر سما
صيحة سماوية
بّفتح بواب القلب
بمليه بحروف العشق
بدفيه بمشاوير منسية
بشيل الزَعل
من قصص عادية
بغفى بصورة بطل
وبرتاح
ع كتاف غنية
يا صوتها المليان حنية
لو كان فيي
حَوشِك بالأيد
كومة حبق
وزنّر ع خَصرِك
لوعة التنهيد
وأطلع ع صدرِك
تشلحيني بعيد
لوكان فيي
برجع من جديد
نتسابق وقلك تعي
نهرب مع خيوط الشمس
نرتاح بالفيّي
ويشلح تيابو الهمس
بحروف نارية
وتتلبك الصابيع
بدا تقطف الكلمات
متل العسل
من خابة متكية
تَ ضم لو أنو الصدى
ع قد ع قد ما فيّي
ورجعت لوّح بأيد فاضية
يمكن أنا بعدي أنا
وبعدو الحلم هيي
بتهرب
مع طلوع الفجر
وتطل حد النبع
بعد المسا
بخيال جنيّة
لاصوتَها باقي
ولارقرقة ميّي
يا صوتها
المليان حنية
بحبك
بحبك متل صبح
انجلا
بحبك متل ضَو القمر
بحبك متل قلب
ابتلا
وناطر تجي غيَمّة مَطرْ
بحبك متل سكّة
حلا
بحبك متل
رَغبة سَفر
بحبك متل رمز
الصلا
بحبك متل فييّ الشجر
بحبك
متل حرف انكتب
ع دفتر العشّاق
بحبك
متل صلحة
بعد ال خناق
بحبك متل
عَذب الكلام
متل الحمام
يغرّد بوَقت السلام
بحبك
متل شي مبتدا
حامل على جناحو
خبر
بحبك معي بكل الفصول
بحبك معي
بكل الصور
حقيقة ملبّكي
مبارِح ْع غفَلة لقيتها
دبلان وشّا من البكي
مديت أيدي عطيتها
صابيع عَمْ تغزل حكي
وتعَنون المشوار
ع مفرق عشق
سبحان الله تمهلت خطواتنا
وتصالَحِتْ
عَ مهلها نهداتنا
وطافْ الحكي
بالهَمس
شو نفع الحكي بالوشوشة
وصار اللمّس
يغمّق ويشد الأيد
وصار المدى ال بعيد
قدام عيني يغربل مواعيد
وتلبكت
متل الحقيقة الغافية
بحضن الزمن
وصارت حقيقة ملبكي
كل ما التقينا
كل ما التقينا يا حلو
منغزل حكي
مني الك
ومنك الي
وشو ناعمة الحروف
لمابسألك
وشو مدهبي الكلمات
لما لما بدللك
وبين الطراوة والضجر
عشب وندي
هيدا الحكي مني ألك
ومنك الي
ت خبرك
أنو القصيدة بتنزرع
ما بتنحصد
يا ريت أحصد
شي قصيدة بهالعمر
ت زين بعطر
القصيدة
شو انخلق
عندي عطر
وبحلف لحالي وبستحي
تاري العشق
حلفان
كلو بينمحي
هيدا الحكي مني الك
ومنك اليّ
لا تهرَبي
لاتهرَبي
ولا تطولي غيابِك
حلوة الصلا
قدام محرابِك
لا تهربي
ولا تخجلي
كلي ع َبعضي
حرف بكتابِك
مشاوير عمري
تخزقت ع مفارق النسيان
ومن غفلة الماضي
بعدي أنا سكران
بحلم تَ شوف الصبح
غافي
وشوف المسا صحيان
ونقّلب الصفحات
ورقة بعد ورقة
هون انكتب سطرين
وهون انرسم قلبين
وهون انمحى زرين
وخجل القميص
يكمّل المشوار
وما كان بحسابِك
تفلت ع خصرك
أيد محترقة
وتزنرك بالنار
وتشلّع بوابِك
لا تهربي
ولا تطولي غيابِك
ـــــــــــــــــــــــــــــــــــــــــــــــــــــــــ
التصنيفات : غير مصنف | أرسل الإدراج | دوّن الإدراج
نوفمبر 11th, 2007 at 11 نوفمبر 2007 9:40 ص
أيا وطنا
قرأت في عيناه
ما كان
وما سيكونُ
دمت بسمو
نوفمبر 21st, 2007 at 21 نوفمبر 2007 1:24 ص
يا رائع الحرف اشعارك المحكية حكايا مطوية فى جنبات القلب
اسعدتنى قراءاتك مرات ومرات
شكرا لحروف نبضك التى تسعد الروح وتناجى البوح وتثير الحنين
البنت المصرية
نوفمبر 21st, 2007 at 21 نوفمبر 2007 4:34 م
لكل شمعه نهاية
ولكل دمعه حكاية
ولكل جملة بداية
وها هي البداية
ترى ..
لمن ستكون؟
يناير 28th, 2008 at 28 يناير 2008 5:27 م
حاولت قلب الصفحة والمضي ..
ولكن بقيت الحروف عالقة بعيني كدمعة تأبى السقوط
قاومت الدفء الساكن بين السطور..فأوجعني خيط الصقيع..
فعدت أدراجي مليئة بالكثير …الا أني سأكتفي بالقول…
بدون تعليق
يونيو 16th, 2009 at 16 يونيو 2009 4:03 ص
قصائد محكية من أجمل ما قرأت